Solon

Dr Solon (altgriech. Σόλων, Sólōn; * woorschinlig um 640 v. d. Z. z Athen; † vermuetlig um 560 v. d. Z.) isch en athenische Staatsmaa und Lüriker. Im Vergliich zu andere Lüt us sinere Zit wäiss mä über e Solon relativ vil.^[1] Es macht dr Iidruck, ass dr Solon as Gsellschaftsanalütiker, as politische Füerer und Reformer, aber au as Dichder, Filosoof und Redner en ussergwöönligs Aasee gnosse het.^[2]

In dr Antike het mä dr Solon zu de siibe Wiise vo Griecheland zelt. Die modärni Forschig beschäftigt vor allem si politischs Dänke und Handle, wo d Entwigglig vo Athen zun ere Demokratii iigläitet het. Er het d Schuldsklaverei z Athen verbote, het sich drfür iigsetzt, ass jede Bürger mitverantwlig isch für die grächti Ornig (Eunomii) im Polisverband und het die ganzi Bürgerschaft an d Herschaft vom ene Gsetzwärk bunde, wo schriftlig festgläit gsi isch.

Sini Mitbürger häi zum Däil villicht von em sogar erwartet, ass er si Stellig as Nöiordner und Gsetzgääber wurd usnütze, zum sich zum Tyrann z mache, dr Solon het aber, won er mit sim Reformwärk fertig worde isch, sini Häimetstadt für e langi Zit verloo und isch go umeräise. Eso häi d Bürger d Verantwortig für die nöiji Ornig sälber müesse übernee.

1. ↑ Kurt Raaflaub: Einleitung und Bilanz. In Konrad Kinzl (Hrsg.): Demokratia. Der Weg zur Demokratie bei den Griechen. Darmstadt 1995, S. 9 f.
2. ↑ Hartwin Brandt: Solon. In Kai Brodersen (Hrsg.): Große Gestalten der griechischen Antike. Münche 1999, S. 84 f.